نعيش بيك وفيك

نحبك كيما حب جاك في التيتانيك ،نحبك حب تملك وتمليك ،حياتي لكل ليك وكان تطلب عمري اكيد منبخلش عليك..اني صغرونتك لفغيابك تهنيك وفي حضورك تبدا هكا هكا بيك وكان تقدر من عين لبنات في شونها تخبيك …اني صغرونتك الى بتذبيلة من عينيك تنسي الحروف وعلاش كانت تخاصم فيك واني الي ميجيها نوم كان ما تطمن عليك ,وتستناك سوايع باش تسألك شبيك و تحكيلها علي صار عليك وشعملت لقراية والخدمة فيك. وتتمني يجي نهار تتكى جنبك وتغطيك وبين يديها ادفيك وتلعن السبب ليخليها بعيدة عليك ومتنجمش تلمح الضو فعينيك ،صغرونتك الى تخاف عليك وكي تمرض نسهر جنبك الليل ومنرقد كان منداويك وتستني وقتاش تزيد تفرح بيك وتنورها بتحقيق كل أمانيك ،نحبك ونموت عليك وكان نلقي نخطف القمرة ونهزها ليك تضويلك لياليك ونسرق الشمس ونخليها مجعولة كان باش في البرد ادفيك . نحبك ونموت عليك وانتى الى خترتو ليا شريك .. نحبك خترك رومنتيك وتفهملها في الموزيك.. زيد صحا ليا وليك تفهمني رغملي دومانك الميكانيك والتكنيك وفازات الاوتوماتيك وحكايات الروبوتيك واني نهار وليل غاطسة في البوليتيك ونقرا فكتب الصعاليك وديانات الكاثوليك والخنار الفونتستيك وتاريخ المماليك ومانيش ياسر ديناميك كلبنات من بوتيك لبوتيك وحتى تفدليكي ياسر ماسط وركيك وصحيح فت العشرين ومزلت نشرب في النسكويك واندادي راكشين في الموفامبيك ،الله غالب ياسر راني كلاسيك اما وراس لون العروق فيديك نحبك ونموت عليك وكان تطلب عيني نعطيك نستناك تكمل وترجعلي راني متوحشة لمسة منيديك ايجا وتو نعيش معاك حتى في خربة في المكسيك لمهم نكون ليك ونعيشو عشربة فريك والبريك ونشربو في دبابس بلاستيك وكان ملقيناش.. خبز يكفيني ويكفيك لمهم فاخر النهار نرقد بين ذراعيك ونقوم الصباح وبستيلو بيك نكتبلك كيما الحروف الي توا قاعدة توصل ليك وتهني كان تعبت تو نعملك ضربات تدليك اما بشرط كان شبكت بيناتنا هانو عليك التسليك بكلامك الشيك كيما يعمل جاك في التيتانيك ونحبك ونموت نموت  ونزيد نموت عليك يا مهبلني بيك

وعمري منسلم فيك

سلطان زماني

انا الراعي ليغدروني وبسم الدين قتلوني ،ذبحوني
تتفكروني والا كيما غيري بعد ما تحت تراب الخضراء ردمتوني نسيتوني ؟ يواتي نهار وتتفكرو تصويرة امي فوسط الدار ادادي وتنادي “وليدي شواوني في كبيدي اللي عيا يسرح باش يرويني وفي المرض يداويني ..خطفوك مني يلي ستنيت ربي فيك يجازيني وفي كبري تراعيني وكي نغضب تهبط الجبل وتراضيني”و

انا الراعي الي نبات الليل في الجبل وبين الذياب نسري باش يطلع النهار وخبزة نجم نشري،الفقر راو يشوي والذل يكوي وضو الشمس القليل يعري وبالمرارة ماه حلقنا الشايح يسقي كيفي كيف ولد عمي الي همو يروح بفلوس لاولادو ويقدر يلقي ما يعشي
انا الي امي قبل طلوعي تبقا توصي رد بالك نهار للخاين راسك توطي ..جبت راجل مجبتش حديد مصدي

قتلوني وللكلاب رماوني وعذبوني وذنبي فقير وعادي تصير والي متغطية ابشكير تقلك ملا تجوبيبر شطلعو للجبال طفل صغير
للا سامحني حبيت نطير والا بالكشي برعيان الغنم نولي بليونير ونقدر نلبس كيفك الكاشمير!
وسي الرجال في بلاتو التلفزة ولا على دمي يغير وقلك يحير كيفاش ف2015 عبد للفقر اسير ولاخر قلك عيشتنا عيشة حمير وكان نموتو خير خسارة خويا منعرفوشو احنا لاسونسير كبرنا وستانسنا نركبو البعير
راسي ملوح في الساشي وسي الوزير في رئيس الحكومة يستشير واش يدير وشنوة يصير كان متنا مش خير؟ وناكلو الطباشير عادي سيدي الوزير بنقص تبذير .
بجنب راسي كثر التصوير علقليلا بعد موتي وليت ملمشهير وباسمي كثر في البلاتوات التصدير وبدا عاد التبرير والتشوحير ورؤساء التحرير مجتمعين خلي عاد متزوير والتحندير
ومزعمكم يا نخبة في التنظير والتفسير
قتلوني وقالوا جاسوس والوطنية ولت بالمعكوس يا جماعة الترموس ..قتلوني ومشا فيبالهم باش تقوم البسوس ويتعلموا من موتي الوطنين دروس اما الله غالب فهلبلاد هاذاكا المقرطس هاذاكا المهروس وهاو تكشف بالملموس لفايدة في طهر النفوس حتى كان قطعولنا الريوس يا وكالت القاروس توا عام ملي غدروني زيدو طفيو الفانوس واغطسو للعنكوش في الكوسكوس يا زنوس وامليو اك الضروس
مت انا ومازال 10ملاين جاسوس حب البلاد في عروقو مغروس مهما غرق الداموس بروح حنبعل الكاهنة وعليسة محروس يجي نهار ونروك يا داعشي تحت ساقينا معفوس مرفوس وجيشنا يعيشك ابشع كابوس ✌

النفق

امام النفق حيث تتحد الاجساد

وتهرول في عروقنا دماء الاجداد ،تدعونا للوقوف في وجه الاستبداد تعلو الاصوات ضد الاصفاد

تندد بحكومات الاحقاد ضد الامن الكامن للفكر بالمرصاد

قالوا لنا لا للوقوف امام الاسياد فهذا بالدين الحاد

ورفعوا في وجه الصوت الحر الازناد ثم طلبوا الدعم والاسناد

اجتمعوا افوادا افواد

ليقاوموا تلك الأعداد الرافضة للأقياد والإقتياد

وحاولوا إخماد النفوس الثائرة وبقتل الأبرياء من الأولاد غرسوا الاوتاد في الاوراد وحرقوا الفؤاد.

تعددت الأياد وضل الحر ضد الفساد

ولا حل له سوى الإرشاد نحو واجب الاحتشاد للنهوض بالبلاد

إلا ان الأوغاد اعتبروه ارتداد وعملوا على ايصاد الأبواب والانفراد بالعباد وبهم الايكاد

فأصبحت الثورة مسرح أولمبياد ولم يبقي منها الا ذكرى أعياد

تقهقر الاقتصاد

ومابال نواب الامة سوى الانعقاد

مجلسنا العتيد خمسة في عين الحساد

قواد ،جلاد،تواد ثم تشاد

الكل جماد

نائبة تفكر في ملئ البراد والآخر همه تعبئة الزاد خوفا من عودة الجراد وآخر يدعو للجهاد

رئيس يعلن الحداد والشعب رقاد

غياب للحياد والمستقبل سواد

وارتفعت حتى أسعار السماد والنخبة جالسة في السندباد التكسي يبعول في العداد والاجنبي يستفاد اما الفقير في آخر النفق يناد ليت الزمن يعاد أو فليمت العبدالجواد ليعيش الاسياد الاعتاد

شباب في استعداد للاستشهاد لاسترداد الأرض من حكومة الاضطهاد والاستبداد

عالم حيث الفقير يستعبد والغني بماله يعربد والبهيم يسكن المعبد ونسي الواحد الأوحد

وصاحب الرزق يجحد والحر محكوم مؤبد والفن بالذل يمجد حتى الساجد المتهجد في الخفاء للنساء مجدد ينسى التشدد وفي احضان النساء يتلبد

ومتلقى حد

وقت الحزن باهف عليك ياخذ
وقت الفرح من بين يديك يتاخذ
وقت الكره يشد جنبك ولمرا با يبعد
وقت ثيقتك تتهد
وقت بالغدرة تتصهد
ومتلقى حد
وقت الوحدة فتركينة تحاوز فيك وتتشد
وقت خاطرك يترمي ولا واحد يمدلك يد
وقت ايامك تولي لكلها خوات الأحد
وقت تنسي شكون تعبد اما الحقد ليك مستعبد
ومتلقى حد
وقت تحارب على حريتك تعافر وتلقى الظلم ليك عابد
وقت الصاحب ورا الحيط ليك لابد
واذا شد عليك دوسي؟ يولي يعربد
وقت تستسلم وتقول هلوضع باقي للأبد
وتحكم عليك بين هناس مؤبد
وقت مشاكلك وحدك تتكبد
وقت الكلها تندد اما حد ما يخمم هو يود
والجاحد يصرفق فيك من خد يرتح خد
ومتلقى حد
وقت تضيع ومتفهم الموحد ململحد
بكلها فوجوه بعضها تمجد
وفي القفا؟ مقال حد لحد عادي يتسبو عروق الجد
اذا مشيت ريح السد
اما قدامك مزين هلقد
ومتلقي حد
وقت اطيح السكاكن علبقرة تتمد
بكلها تكبر روسها وتولي تهدد
وقت عروقك تصدد
حتى الطقس يولي عليك كاسح متشدد
وقت عدوك من صاحبك متنجمش تفصل تحدد
وقت ضربان اللغة يعمل مسد
وقت تزهالك ترا المنافقين بيك تبشبش تتودد
وقت حتى فعايلتك الوجوه تتبدل تتعدد تتجدد
وفي ثنيتك بكلها على قفاها تتمدد
وقت الى تحبو فلحمك يقدد
وفنهار يبعدد مغير لا يتردد
وانت تفشل والسبب متعرفش تحدد
وعمرك قاعد بين عينيك يتبدد
ومتلقى حد

الريح فحبنا نفخت

تصدق؟ منعرفش علاه قلبي وبالحب الي بيك املا! نحس فكل شيء تمحا خوفي لنضيعك مشا ورا ضهري ترما

تردم بعد ما وليت عليا فبعد السما
لا مش اني تبدلت اما نسيت الي فات ..حب قدام وبات ..واني نكره تسخين والا تجمير الفتفات الي منامس كنت منو نقتات
فديت ومنك راني عييت وانت ومش حد أخر كان نقدر فعيني نسكر عليك لداخل

وتوا؟ حليت عينيا وبلاصتك ضربها الهوا وقربك والا بعدك عندي كل شئ فنظري تسوا ختر قلبي وراسك تشوا منكلامك القاسي عليه وعرق بعد عرق ترخا وتوا وليت نخمم زعما قلبي عند غيرك ينجم يبات بعد ما وعدك يبقالك للممات ؟
كهو توا الريح فحبنا نفخت وطيرت كل حاجة بينا نفحت والقصة للينا ضحكت غمها الماء وتنفخت ومن جهة اخري وردتنا لسقيناها قطرة قطرة شاحت ..ذبلت وبلاحت واوراقها ورقة ورقة طاحت بعد ما تعبنا باش ريحتها البنينة فاحت

وتوا هاي حتي اغصانها كساحت رغملي ملول حكايتنا صاحت فيقو كبشو فبعضكم قبل متقولو اهاه ضاعت
هي ملول فكفوفنا شافت اقدارنا الي لاحت

صحيح حبينا اما هانا برواحنا غرينا وحكايتنا تحت الارض ردمنا غطينا
سلام يا حبي .

كلما زارنا طيف حب

تغيضني كي نراه فمنامي ونرى خيالو لمنعرفوش قدامي ونتمناه يجي يراني قداش وليت محلاني والناس الكل تقول مبهاني شحسن ربي ففعالي ويرحم الى رباني وعلم لحروف للساني.. وساعات يسألوني مصفاني هذا لكل منين جاني? وشكون سهر فليل قراني وشكون فلعيد كساني وبعرق نهارو شهاويا لبالي وبسمعتو علا شاني ومن برد الليل تحت سقفو دفاني وكي نوخر دقيقة يستبطاني وعلفطور يصوم اما يستناني واني صغيرة ملغول فحضنو خباني وللابجدية هجاني حرف حرف صوتو هناني للي النوم جاني وللكتب قراني والغلط مصحيح وراني ..حاجات وكلهم امنيات فخيالي بقاو حلمات.

سيدي وسيد اسيادي لخليتلي بعد اسمي اسم اجدادي وبعدي اسمك يبقي انشاءالله لاحفادي وهذا وعدي وعهدي وبلي الزمان عليا يعدي تبقى فبالي كتحدي وبلاصتك فقلبي عمرها لا تندي

نوعدك بلي نغطس فطين وبلي الحمل يولي رزين وحتي كان قلبي منغيرك ديما حزين يبقى اسمك عجبين ثمين وفي الجواجي حصين امين ويبقي حبك اول دين وخلي يقولو حتي الكفر على جالك بنين ولو نوصل عمري ستين والا حتى ثمانين انتي فيا عرق متين خشين تي حتى يوليش قلبى عليمين انتي وهو الاثنين بالنسبة ليا اكسجين ولوجايعي اسبيرين وهاني توا في العشرين وانتوما ليا وتين في معصمي ساكنين موطنين فدمي معششين نعرف كان جيت حي راك عليا حنين وديما منك نتعلم حتى كان منراكش بالعين ماو قلولي راو رزين رصين وصوتو كلو لين وفيه صيفت زين وسنيه فبيوضيت اوراق الياسمين وقالولي زادا كنت تكتب دواوين وقتها عرفت منين جاني اني الغرام ماك انت اصل التكوين ماو منك كلامي جاه التلوين ضهر الي لكلو متخزين لفجيناتي.. ومنك التموين ..ماو مع بعضنا نعملو عجين مرطب لين ومع هسنين وليت عندي بلحق يقين الي اكيد اني وافكاري وغرامي منك مجرد هجين  معندوش علاقة بحتى حاجات اخرين لا دارون ولا قرايتي لكتب طه حسين

للي توا قاعد يقرالي نصيحتي ليك شخص هذا اشبع بيه قبل مربي يرضي عليه وعندو يهزو يحميه اول عبد في غلطة عيط عليك شدك منوذنيك وحفظك لاناشيد وعليك عقابو كان شديد وبصحة راسك بقى عنيد حديد وقد امانتو كبرك وكان راجل صنديد وديما يحاول يوقفك على ساقيك وحتى من روحك خاف عليك وراسو شاب باش مذيوبة للبرا يحميك ..الراجل لول لحظر على حروفك وسعى باش صبية يشوفك

ختر اني نعرف الفرق ..اني تعلمت الحب وحدي وانتي تعلمتو منبوك كي يحكي

بالصوت العالي

اناديك اناجيك نخلط عليك وبالصوت العالي انقرق وانلحلح بيك

.وفلخر نسبلك عروق والديك وبدعا الشر نغرقك منراسك لصبع ساقيك ونتهد وكلحجلة كي تطيح فمنداف صياد وتتشد, يضربني السرد ونتعب منهار لحد.. ونفد واني نعرفك في الحقرة مقال حد لحد والناس تشهد ونتخمد وحتى كينغمض عينيا بخيالك نتصهد ونتنهد..تي سيبني اعتقني    يرحم هاكل جد .والا ايجا …ايجا خلينا نلمو خطاوينا وبايدينا نكتبو حكاوينا, خلينا اني وانتي وهزمان نردوه لينا نرسمو فيه خطاوينا وخطيوة خطيوة للي الدنيا تزيان وفي سماها نبنيو لينا مكان يجمعنا ويتلون الوان الوان

 وسامحني ساعات تراني باردة ساردة شاردة ..خاتر كلما نغمض عينيا 

نراك, نخاف نتربث ومنفرشي نتقذف نجري نتقضف

ماني الله غالب حبيتك وفقلبي سكنتك و عمرتلك بيتك ومن خوفي تحت جفوني خبيتك وعلى عينين الناس داريتك وللغير عمري ما رميتك  وغرت عليك وغمرت بيدي ملحب وعطيتك وبعيد عليا لانهار حسيتك

.وانت لا نهار خذيت بالخاطر

الدنيا كذبت علينا

حلتلنا في الجنة ذراع وخرجتنا ملقاع ونشرتلنا الحب وبدات توساع.. وكل مرة ترفاع مرات تمشي ارباع ومرات ترجع اسباع, وقتلي يا للا الملتاعة جا وقتك تشوف الابداع تنسي الاوجاع نهارتها همستلي وبعينها غمزتلي ،وشوشتلي جا وقت الاجتماع سمع قلبك الإيقاع ومنغير اندفاع حل الباب ..وريتك ..ريتك والسما ضاعت والارض معاش ساعت .. الدنيا ضحكتلي بتبسيمة وقتلي ايا يا للا في الحب باش يولي عندك باع وذراع وبين الناس حكايتك تتذاع فرحتلها وقتها ..اما غدرت بيا وعفست فيا كي عوايدها لعبتها عليا بكل انواع .. مقتليش علبياع والحب لضاع وشد بلاصتو كره يساع حياة والواحد فيها معاش عارف منين باش يلتاع ملاتباع والا مناس للبست اقناع ومهمها فينا كان لاطماع ،عفست علاوجاع ولات تشباع من زفت لاوضاع وغرست فينا سكاكنها للنخاع..دنيا مليانة وداع واطماع عاشين في صراع ونزاع مشاكل توريك الزنباع وين يتباع ،دنيا نساها لفاع لسانهم لساع ورجالها في الكذب صناع والبريمة فيهم وقت مصلحتو يولي حمل مطواع عامل روحو واحد مضباع ومن وسط القطيع ضاع ومعاش ليهم تباع ولشخصيتو هو الوحيد الصناع واذا وصل يولي لكاع

 …واحلامنا معلقينها عشماع

يتبع

نحكيلك

اي يا عزيزي شنحوالك بعدي هنالك بعدي؟ شايخ والا لتوا دايخ؟ مزلت معينتكش تحكي وكلامك مرخي والا كهو يكفي؟ فقت بقلبك معاش محمي والزمان منوهكا لتقال معاش يمحي! شحالك شحوالك شعامل فايامك وباش ولا غرامك! واصحابك سالوك شصاراك شلقو بنارك؟ والا ستحلاو جمارك وقالولك ايجا اردم حفارك.
تتفكر ؟ كي تبدا تعارك وتبدا تهدد وتقلي تو تشوف شيجرالك وبالي لمرا الجايا راك تارك وفحكايتنا معاش مشارك وشكون يسالك ماك قتلي بيا باش تعمر دارك وبصراحة محلاه فالك قلبي بيه هالك ماو فيبالي راجل غير اندادك كي قتلي نو حد ميفكهالك ولو السما بالارض تتشابك غير معايا حياتك متحلالك وانتي ليا مالك واشكون يسالك واني نقلك الله يبارك
ايا نقلك سر ؟فيبالك ! نراك ملاك اما ناويلي علهلاك وكل ليلة نشد الشباك ونلوج على وجهك المضحاك يابو لحناك يلي لحيوط قلبي انتي الملاك ..لحاك شبيك حلو اكاك وزينك زين اتراك !نمشيش بحبك نتعدى استهلاك؟ ونحلف كان يبعدوني عليك نضربلها امونياك وهي خلات خلات ربي هو السلاك ونقلهم هو اكسجيني وماندراك يزيو بلا انتهاك وخليوني مينفعش فيا لا اشباك لا اسلاك نتمني لقياك وميهمني فلشواك وكان نلقى نفصعلك علافلاك .
قتلك عاد يا محلاك واني نطل مشباك ونتفرج علاكشاك ورغمري مريت ملبنات كان الاوراك وملولاد كان لعراك قعدت منغير حراك للي ضوات واذنت لدياك
ورقدت وتمنيت نخطاك ونمضمض عليك بالسواك اما حبيت كمام في حلمتي نلقاك ماو غريبة صغرونتك حاسبتك سريلاك صباحي بلاش بيك بلاك (black) رغملي ساعات نحسك مغروس فيا كلمساك كييتعدى على كاديلاك
ايا مغير لاتتفكر شي يا شسماك امشي ومتتلفتش وراك وانشاءالله ننساك ومنتفكرش سصارلي معاك ونلقي مخي لبرا رماك وفدعايا معاش نتمناك وخزرة عينيك معاش تسببلي ارتباك ..ربي يبعدني على بلاك وانت الطف تقولش عليك عام باك لتعبي سفاك كيحزب الاشتراك عام حرب الانتهاك والانفكاك ..ممضاك والله يبارك ..تره توا شرايك!عجبك قرارك واصرارك على خرابك ؟ فرحان بانتصارك
نقلك حاجا! بلحق مقل حياك كان صدقت الى راك ليا ولكرامتي ملاك
نكتبلك ونضحك هاني وليت انجم نهدك ونسبك زعما بلحق معاش نحبك والا معاش نراك محنك مشبك ! وبصوتك معاش نتلبك
..حاسيلو