نعيش بيك وفيك

نحبك كيما حب جاك في التيتانيك ،نحبك حب تملك وتمليك ،حياتي لكل ليك وكان تطلب عمري اكيد منبخلش عليك..اني صغرونتك لفغيابك تهنيك وفي حضورك تبدا هكا هكا بيك وكان تقدر من عين لبنات في شونها تخبيك …اني صغرونتك الى بتذبيلة من عينيك تنسي الحروف وعلاش كانت تخاصم فيك واني الي ميجيها نوم كان ما تطمن عليك ,وتستناك سوايع باش تسألك شبيك و تحكيلها علي صار عليك وشعملت لقراية والخدمة فيك. وتتمني يجي نهار تتكى جنبك وتغطيك وبين يديها ادفيك وتلعن السبب ليخليها بعيدة عليك ومتنجمش تلمح الضو فعينيك ،صغرونتك الى تخاف عليك وكي تمرض نسهر جنبك الليل ومنرقد كان منداويك وتستني وقتاش تزيد تفرح بيك وتنورها بتحقيق كل أمانيك ،نحبك ونموت عليك وكان نلقي نخطف القمرة ونهزها ليك تضويلك لياليك ونسرق الشمس ونخليها مجعولة كان باش في البرد ادفيك . نحبك ونموت عليك وانتى الى خترتو ليا شريك .. نحبك خترك رومنتيك وتفهملها في الموزيك.. زيد صحا ليا وليك تفهمني رغملي دومانك الميكانيك والتكنيك وفازات الاوتوماتيك وحكايات الروبوتيك واني نهار وليل غاطسة في البوليتيك ونقرا فكتب الصعاليك وديانات الكاثوليك والخنار الفونتستيك وتاريخ المماليك ومانيش ياسر ديناميك كلبنات من بوتيك لبوتيك وحتى تفدليكي ياسر ماسط وركيك وصحيح فت العشرين ومزلت نشرب في النسكويك واندادي راكشين في الموفامبيك ،الله غالب ياسر راني كلاسيك اما وراس لون العروق فيديك نحبك ونموت عليك وكان تطلب عيني نعطيك نستناك تكمل وترجعلي راني متوحشة لمسة منيديك ايجا وتو نعيش معاك حتى في خربة في المكسيك لمهم نكون ليك ونعيشو عشربة فريك والبريك ونشربو في دبابس بلاستيك وكان ملقيناش.. خبز يكفيني ويكفيك لمهم فاخر النهار نرقد بين ذراعيك ونقوم الصباح وبستيلو بيك نكتبلك كيما الحروف الي توا قاعدة توصل ليك وتهني كان تعبت تو نعملك ضربات تدليك اما بشرط كان شبكت بيناتنا هانو عليك التسليك بكلامك الشيك كيما يعمل جاك في التيتانيك ونحبك ونموت نموت  ونزيد نموت عليك يا مهبلني بيك

وعمري منسلم فيك

يا سيدي نحبك ..وعمري منيزي

نحبك منامة ونحبك كابوس

نحبك كيما الرعد يحب المطر ونحبك قد كره الشجرة للخريف

نحبك كيلون القمرة الظاوي بنار الشمس والكلمة الدافية لتقالت بالهمس .. غشي ودلالي عليك والسهرية واني نرضي ونلحلح بيك .

زايد يا تكون ليا يا عمري لغيري ما نعطيك! مكبشة فيك ..اي مكبشة فيك واهرب كان قلبك يعطيك

حبني ميسالش والله منغر بيك ,وراس الرسمة بين خديك لانغدر بيك تي مهبولة انا بيك! ..اي وراس مخدتي لمحبيت فيحياتي غيرها ونومي لغار منك وهرب عليا

اي مهبولة ونحبك بهبال .نحبك قد كره الصغير للخضرة وقد كره المستني للنطرة

قد كره كلبتنا للماء

وقد كلام الحب الى ما يتنسي

نحبك حرب وهدنة وردبالك تجنى وتخطر في بالك هجرة .راني نخاف عليك ونخاف على روحي بعيدة عليك!… نراك في المطرة لمشتتة ونراك فجرية وهربة من ترنيخة الشتا ,نحبك فوق لأرض وتحتها نحبك في سماها وعدد نجومها

نحبك كحب مراهق لدخانو وحب عزوز لعتبة دارو ونحبك كي حب صبية لضفيرتها وحب عازب لخزرتها تي نزيد فهبالي والا يزي؟ يا سيدي نحبك ..وعمري منيزي

كأس فاض

​نومة صغير بعد هيجة 
صوت الريح وصهيج

غصة قلب فقد غصب

خسر الحب مغير ما حسب 

سمع مني كلام .. وبيني وبينو تسب 

بعدو مضمض بشب 

كيفاش ينسى الي في نهار حب

وفي نهار تحب

دنيا حلوة ومسرارة .. قاعدة نحاول ننسى المرارة 

دنيا مزيانة ومنورة .. اما اني وانت عشنا كذبة وحكاية مزورة

بيني وبينك بحر وموجة

بيني وبينك طريق عوجة 

جبل على عرض فلوجة

قلبي تعبى وفاض 

مليعة تعلم ،حفظ واعتاض

واد بالضغط راض 

نور تسود بعد بياض

ونهار للمخ قال لا سيدي ..اعتراض!

علاقة أولها وآخرها أمراض

ونهار للقلب قال للحب ليوم وقت انتفاض

وكي علاقة تفشل تبان الاعراض 

وكي الحب يتعب لازمو إجهاض

حبيت تراني مردومة بدموعى عل أنقاض

وعلى افتراض..رضيت وقبلت الهجر،المزاجية والطبيعة الزفتة عل مضاض ..كنت فيبالك ننسى تمليحتك وبيعانك و الكلمة الموجعة كوجيعة مخاض!

تشعبيطة

ايجا نحكيلك على اسمي لكتبتو عجبينك

تدعثر وتحصل وتحبني وتلقاني مشعبطة فذيلك تتكب وفي شوني نشيلك

اطيح وبدبشي نمسح دمعة عينك

ادوخ فيا وتفيق تقاني راكزة فوق جفينك

تنسي اسمي ونرجع نحفرو على جبينك

وكي تحزن شكون بغصتو يبكيلك

وكي تتكعبرلك وتجري تقلي جيت نشكيلك

وكي تهجر شكون يصونك وكي تعيا شكون على كفوف الراحة يشيلك

وكي تسلم شكون يشجعك ويعيلك

وكي تجفى شكون يستناك ولا يعتقك لا يقيلك

وكي تمرض شكون يقلك هيا شد حيلك

محرها التبسيمة بعد الغصة والقلب لسواد فحيمة ذنب الي عطا قيمة

ومشا فيبالو تنجم تنبت وردة فألرض بلا ماء .. يتيمة

وفيبالو العصفور يغني حتى كان السماء سودا قتيمة وقال ننسي بكليمة

ونرمي ورا ضهري الشتيمة ومعاش نتلفت وكي طوالت ثنية الوجيعة والجفاء كبر وخلف في الجواجي تلييعة والقلب تحمم ومعاد تفيد فيه ضميدة .. على نار هادية طاب سفيدة

مناجاة

والنفس بعثرت ،والروح لخالقها تبخرت ..

وانا كما انا بينكم.. جسد وهامة بفراغ قاتل وفجوة مرعبة من الداخل ..

خذوا كلماتي مني في احضانكم ،رحبوا بها بدفئ مابقى من إنسانية.

وكأن أحداث الماضي شبح يطارد صحوتي وكأن ذكرياتي تلاحق غفواتي سؤال لا يبارح أفكاري ..

هل سأرى الأنا المكسورة ثانية؟ لا أستطيع تحمل ذلك مرة أخرى الزمن لا يعود .. أعلم فماذا إذا عاد ما كان يربطني بذاك الزمان! الاهي .. انت هناك؟ هل تسمع مناجاتي؟ طيب هل تراني على الاقل؟ الأسف لم يمحي ما مضى.. فهل يمكنك انت؟ أشتاقني فهل تعيدني الى نفسي! أحتاج ذاك الألم لأكف عن الخوف مما هو قادم ذاك الألم سيطمئنني ! ألمي كان وفيا .. لم يتركني .. كان يكمل نقصي ! جعلني أنضج ،أقوى.. حتى أجمل بتلك الابتسامة المفرطة التي كانت تحرقني ..

عدت غير التي كانت سنوات مضت من دوني أشتاق نفسي ،همسي.. وأحلامي .. وجداري الآمن أبحث عني ولا أجدني سوى في طيات صفحات الألم مشاعر الغضب ضلت حبيسة أشتهى نسيانا البقايا ارهقتني أشتهي وفاء رحيلهم مني وعني

ربي أتوب عن ألمي خلصني… اطفئ نار الغضب قلبي يريد ان يطهر .

نحب نحبك

نحب نطير ونعمل جناحات
نحب نطلع فوق القمرة ونعيط باعلى صوتي ..نهوااك
نحب نغنييلك ونتفنن في شقاك
نحب نلعبو غميضة ونتعب باش نلقاك
نحب نعنقك ونحس دفاك
نحب نحبك
نحب نتشعبط فظهرك وبيديا نوصل لسماك
وفي اعلى نقطة تحفى ساقي ونراك
نحب نعدي الوقت حذاك .. راسي على صدرك ،نسمع نغمة قلبك وموسيقة الدقات
نحب نفيق كل يوم على كلمة محلاك
نحب تشدلي يدي وسط الناس وتقول متاعي شكون يسالك.. تعمل في ملكك ما يحلالك .
نحب نسمع منك نحبك وشحوالك والف مرة تقلي من غيري شئ ما يحلالك
نحب نتدلل ونتشرط ومل حب تقلي على راسي الله يبارك
نحب نكون دميتك لتخاف يجي حد يفكهالك
وكي نتأزم ونرى طريق تسد اطمني وتقلي فال الله ولا فالك .. سوبر مان وتحلي في الدنيا طرقات ومسالك
نحب نشق معاك الصحراء وبلايص ما تخطرش على بالك
نحب نسمع كلامك
نحب نحبك

شجرة بلا فروع

دنيا خوانا واحنا دغف سحبناها لقلوبنا صوانا
للزمان باعوني
كلاو لحمي ومضغوني
اعز الناس غدروني
خترت ثنية مفيها رجوع
وليكم والله ما نعطي الطوع
وانساو نهار تراو مني خضوع
انتم اجرحو وربي هو يداوي ويشبع بعد الجوع
وعلاش نرقدو؟
وعلاش يجينا النوم
وشنو ذنبو المشوم
وعلاش الدنيا ولا عندها سوم
والقليل مش خالط على فص ثوم !
وراس خدودك يا فطوم
ما ننسالك فعلك الدوني يوم
اطول لمسافة ونشق البحور عوم
كذبكم معاش نروم
الكره والبغض عمرو ما يدوم
ونعرف لمات عمرو ما يرجع يقوم
ومعاد ينفع ففعالكم لوم
مليوم قلبي على حبكم باش يصوم
كرهت دور المظلوم
المشتوم
لي كلاولو حقو مهظوم
وهو ساكت ساهي مصدوم
كرهت نكون لي تاعب حيلو مهدود وظهرو مقسوم
بالغدرة عملت ألبوم وبغاز حرقتو اليوم
مضغتو عرضي حلقوم وزدتو على اسمى نشرتو السموم

فيبالي متركزة بيكم وطالعة للدنيا .. طيحتو بيا السلوم
.. تحررت منكم ، وجودكم معاش ليه لزوم

إكتشاف

لا سلام لا كلام
شنوة الحب !
اني زادا قاعدة نكتشف
صحيح ريقي نشف
اما متأكدة حاجة مزيانة تخلي قلبك يرف
وتحس روحك بهمت وخيط فراسك ترخف
وبقا احساسك يقودك وتخاف لا ينسى عليك يسخف
ويعمل عليك بلعاني ودمك فعروقك يجف
تخاف احساسك يغدر بيك وحبل داير برقبتك يلف
وتخاف بعد ضحكتك ترا قلبك حزن ينزف
وقبل مترقد ،كل ليلة تدعى لربي يلطف
وتتمنى معاك تصير معجزة وتصدف
وحبك يدوم.
وتزيد تدعى لربي كي اطيح بيك تلقى راجل بالفم والملا يلقف
وكي تضعف وقلبك يرجف وعينيك بالدموع تبان تلصف ولحن حزين فوذنك يعزف
وتقرر تضحك وتجازف
وتخلى عمرك بحد آخر يوالف
وقوانين العالم لكلها تخالف
وتقول بقلا ليها
الدنيا واحدة
هذاكا الحب
إحساس
كينك خرجت حافية والشتاء عليك تصب
والا تخرج تحت شمس تشوشط تلب
إحساس اطمئنان قريب للي بيتم وبين الرب
تحط الحطة وتهبط مندارك منغير متعرف وين باش تشب
إحساس تخلي الترتوار وتهبط تمشي فكياس انتي والكراهب الماشية والجاية جنب في جنب
اووه .. وكي ترا انسان معين وعقلك يتسلب وعلى راسك تتصلب
وكي يبعد على عينيك خلايقك تتقلب
إحساس نسمة ربيع كي تهب
وغناية مزيانة طرب
والرجال بخلافو تراهم عيدان قصب
تخزر لتبسيمتو و تنسى اسمك واللقب
وترا مشيتو وتنسى باب داركم وحومتك منين تطب
وكي تحس انثى حامت عليه تترعب
وتجرى تخبيه مغير متحسب
واول ميقلك السلام اطيح منطولك وتتكب
وكي يبدأ يحكي تنسي الوقت وتتمسمر فبلاصتك وكي كدس رمل تتصب
ونهارت لتحصل موعد باش تراه وتعدي سوايع ترتب وتركح فشعرك مسرسب
واحساس رسايل عقاب الليل لتتكتب
هذاكا لحب
..ربي يعطيكم محبة الدوم
وحبيب يصون

وجيعة حلمة

تسمع فيا؟ والا بنورك مازلت حابب تتخبا عليا؟
ستنيتك في كل حلمة أطل
وكل متوفا حلمة ومتجيج تتحرق جواجيا
امتاش تحن وتسخفك ظلمة لياليا؟
كل ليلة نرقد مطوية نخافك تجي وتلقاني مرمية
وتعرف؟نكذب..نرقد مطوية ختر نخاف متجيش ونعنق روحي بلكشي روحي ترضى عليا وتوصلني ليك وتسيب هدنيا والا حتى تحطنا فرد ثنية وانى تو نكمل وحدي الثنية
كان جات الدنيا فما حد يخلي ميراش بنتو صبية !
متخممش تجي تخلي في وذني وصية؟ بلكشي وصيتك تخليني نحب نعيش؟ بلكشي تنقضني ومعاش نتعب روحي ونستحلا عذابها؟
فكل عيد تمنيت خيالك هدية ، حكيت معاك ياسر وطلبت منك وقرقت ..قتلك ايجا مرة برك متتكلمش.. خيالك وحدو سيمفونية..تو نسمعك وحدي ونقرى الحروف فعكست تصويرتك فسط عينيا .. ايجا فمنامي وابقا بعيد تو نلمحك.. ونزيد نقرق بيك مريتكش ،اقرب شوية وتو نزيد نقلق ابقا معايا منامة وصبحية .. يزي فيه البركة
… خليتك حلمة ..ونعرفك ساكن فيا هذاكا علاه تلقاني ديما فتركينة متخبية ..نلقا راحتى هكا رغملي منعرفش شبية والناس ميراوش قداشني بحلمة صغيرة مبلية .. حققهالي واعمل عليا مزية!..
نكره راني دور الضحية.. يقززني .. ملي صغيرة نعرف روحي طالعتلك ذكية .. ونهارت لينعرفها فوق راسي مخلية مجلية ..نضحك ونشيخ ضحك ..
مفهمونيش ..ومحسوش بل حلمة لكبرت وعششت فيا .. منلوم حد .. اما خايبة تكون بين الناس وحدانية ..
ماك مجيتش ..وطلعت مسمعتنيش .. هاني نحارب ونتوجع بالكشي في قبرك تحس بيا وروحك ترجع اطل عليا حتى وليت نرقد فلعشية .. قلت بالك يجي فحلمة عشوية ..
الحلمة قوات بيا ويستناوني نولي راقية ومعاش نحلم تجي .. باش نبقى نستفز فيك ونعمل الخايب مدامني منسية .. للي ترضى .

شعفت

حبي ليك .. ميوفاش
وبعدك عمري لشكون يتعاش ؟
والحرقة فقلبي متطفاش وزعما يجي نهار يا من عاش وننسا ونقول ماهي دنيا ولازم تتعاش ؟
صحيح حزني فعيني ميتراش وصحيح ايست ومخي لمريض بيك ميبراش ..ايست وخفت وزعما لاضعفت وفكل غصرة اففت من أف لأف رجفت وكلامك الجاف عفت وعلى ايامي معاك تأسفت وعلى وعدنا لبعضنا نكملو حكايتنا ،على روحي سخفت وقتلها صغيرة ومدنيا اش شفت ..
حليت عيني فيك وبحبي ليك تكشفت وبين الناس تعرفت ..ربط حياتي بيك وجرح بعد جرح نزفت .. ومرة بعد مرة على روحي سخفت ومدم نشفت ومنبين اندادي تخطفت بقات الجهامة والروح بيباتلي من بعيد وقتلي بصوت عاالي لتو ما شعفت؟
على قد ما ادغفت !مزلت تتغطى بكتافو وبكلامو تكتفت وبصوتو لتلحفت ..لتو مشعفت ومازلت تقول على غيرو تعففت ! وكان تثقفت راو ليه !
وبلي قصص معاه ألفت وبلي بتصبح على خير منو والفت وبراسو بصدق حلفت وكل مرة تقول نبعد بعد مرة تقول ستينفت ..!

وكل مرة بعد غش بنحبك زلفت وعليه رفت ورجعت خفت .
وفات .. وكيما كل حب كيوفا .. وقالولي .. قالولي كيما اول طيحة مدروج توجع اما تعلم ترد بالك .. الحب زادا !
وفا .. وكي نتفكر استهتارك بيا نقول هز عليا الصفا
هو الى بدا وزاد جفا
يزيني مشقا والله لا ردو ولا بقى
وكل مرة توحشتو .. لحقيقة زيفت والمر من حكايتنا مسحت حذفت ..وباش نرجعلك رخفت والجو بيناتنا لطفت ..طلعت في الاخر فحياتك اني ضيفة وبحبك يا صاحب الواجب تضيفت شتيت عندك وصيفت .. وتو ضيفتي وفات وعليك رزانت سديت الباب ومغير كلام قتلي للا آنست وشرفت الحب لكل هاك gحفت ونسيت يا سيدي لنتي عليا بالغالي تكلفت وعلا حياتي تعسفت واني راو على رجوعي ليك بالغصب حلفت .. ومعادش نحصل .. شعفت .. الوجيعة ترشفت

تَكِذبْ

بكلها تكذبْ وبخلاف ضفرك شكون يندبْ؟ ..

تكذب باش متقولش كلام مدَبِبْ

وتكذب باش يقولوا ياسر مهَذِبْ ومتأدِبْ

وتكذب باش ميتغَََشَشْ منك المِدِبْ

وتكذب باش ميقولوش أجْدَبْ

وتكذب باش ميقولوش متدين وعِدِكْ بيه يمشي لإدْلِب

وتنسى لإنتي تتعذبْ ورايك ولا مذبَِبْ

غوَاربْ اكثر منهم أقارب ,عقارب وانتي منهم هارب خايف تفيق تلقاهم تحت المضَاِربْ تجري تلوج علَ قارب ْ،قاعد ف كرههم تحارِبْ

مآرب تتحاكلك في المسَارِبْ,تجري تتطايح تقول شارْب خايف مِتجارِبْ وصاحبك على قَضَاكْ يََزارِبْ

الكلَام تسمعوا متْضَارِبْ مَكَارِبْ،على لحمك مَكالِبْ ,ذوقُوك المُر مَشَارِب ولكلها داخلة حياتك تَخَرِبْ وعَلاَشْ مِسْتَغْرِبْ؟

هَاكُم لمْعَاِربْ لحسبتهم أقارب وجاي متحبش تتحاسب؟

من كذبك صحيح خذيت مَكاسب اما يبقاو رَواسِب وهذاكا مَايناسِبْ الكَاذِبْ

تَسْتاَِهل راَسك مَخَشْب،شعرك مشبشب،وجهك مَحطِبْ وقلبك تعَطَبْ والحب منو تََشطَبْ وباقي علي روحك تَكِذبْ